AF268: 34r

97 Bir ʿAcem şehrine geldi bir ʿArab
Bir ḫıyar aldı ṣatun vėrdi ẕahab

98 Dāmenine ṣardı‑kim ėde ġıẕā
Yā ġıdā veyā żuḥā veyā ʿaşā

99 Şehri seyrān ėder‑iken ol ġarīb
Gördi bir kes̱retde bir emr‑i ʿacīb

100 Aña maġşūl [!] oldı aḥmaq nā‑bekār
Dāmeninden nā‑gehān düşdi ḫıyar

101 Ḫarçlıġı yoġ‑idi‑kim ala ṭaʿām
Bilmez idi fārsīce vaṣf u nām

102 Gördi açlıqdan muqarrerdür memāt
Aḍ‑ḍarūrāt tubīḥu l‑maḥẓūrāt

103 Açdı sırrın aldı sikini ele
Ḫalq içinde yürüdi yėle yėle

104 Her soqaqda dėr idi yā ehl‑i reʾy
Hal raʾaytum miṯla hāḏā ḏ‑ḏubbi [!] šay

105 Hem‑zebān olmayıcaq söz söyleme
Zemherīr içre ḫıyarı özleme

106 Vaqtini gözle bürāder her sözüñ
Kār qılsun tā ki cāna her sözüñ

107 Söz ki vaqtinde getürmeye zebān
Qış bahārı gibidür biter ziyān

108 Çün ḫazān ėrdi geçüb vaqti gülüñ
Diñlemezsin ġulġulını bülbülüñ

109 ʿIşq bir ser‑māye‑i rebbānĭdür
Kim dü kevne ol dükān erzānĭdür

110 ʿIşqdan pervāsı olmayan kişi
Murġ‑i bī‑perdür anuñ bitmez işi

111 ʿIşq bir maḥbūb‑i rūḥānī‑durur
Derdi ʿışquñ ẕevq‑i vicdānī‑durur

112 Ḫūb olan ister mi setr ü iḥticāb
Bed‑liqādur ṭālib perde vü ḥicāb

113 ʿIşq ister gendözini göstere
Yoq mücellā āyine ṣūret vėre

114 Saña yüz göstermedi mirʾāt‑i dil
Çünki pür‑jengār ėdüpdür āb u gil

Pādişāhuñ cārīye gördügi ve cemāl‑i kenīze ʿāşıq // ve giriftār olduġı ve şifā‑ḫāne‑i ḫudādan şerbet‑i // ṣıḥḥat ve ʿāfiyet bulduġıdur